الشيخ حسن
يارب ياساتر. يا شيخ رمضان
عم رمضان
إدخل يا شيخ حسن يامرحب يامرحب
الشيخ حسن
أنا جبت معاى الحاج شرقاوى
عم رمضان
إتفضلوا يا مرحب يا مرحب
الحاج شرقاوى
السلام عليكم ورحمة الله وبركاته
عم رمضان
وعليكم السلام ورحمة الله وبركاته
اتفضل يا حاج شرقاوى تعالى هنا
وإنت يا شيخ حسن هات إيدك على مهلك أيوه تمجلس هنا
أومال ما شفتكش فى صلاة العشا
الشيخ حسن
أنا صليت العشا فى زاوية أبو طاقية إللي فى أول البلد
عم رمضان
كنت منتظرك فى الجامع وبعد الصلاة قعدت أتلفت عليك هنا وهنا بس ما شفتكش
الشيخ حسن
كان فيه مشكلة بسيطة والحمد لله حليناها
وبالمرة أفوت على الحاج شرقاوى علشان أجيبه معايا وأنا جاى
عم رمضان
مشكلة بين مين ومين ؟
الشيخ حسن
بين الوله عنتر إبن الحاج صابر والوله جرجس إبن أنيسة الهبلة
عم رمضان
وإيه هى المشكلة يا شيخ حسن ؟
الشيخ حسن
الوله جرجس إبن أنيسة الهبلة بعد ما سقى الأرض بتاعته وسد القطوع إللي فى المسقى وروّح بيتهم إفتكر إنه نسي الراديو بتاعه فرجع علشان يجيبه
عم رمضان
إيه ملقاش الراديو ؟
الشيخ حسن
ياريت
الحاج شرقاوى
ماتتكلم علطول يا شيخ حسن دهّديه
الشيخ حسن
الوله جرجس لقى القطوع مفتوح والميا مغرقة الأرض فراح علطول سادد القطوع وفضل طول الليل وهو بيسرب الميا من أرضه علشان الزرع ما يموتش وعقله صورله ان اللي عمل العملة دى عنتر إبن الحاج صابر لأن أرضهم مشتركة مع بعض
ولما خلص على الصبح خد بعضه وهو هدومه غرقانة ميا وراح على بيت عنتر وقعد يشتم ويسب والناس إتلمت وكانت حتبأه عركة كبيرة وفضلوا طول النهار يشدوا مع بعض والناس تتدخل بينهم وأنا ربنا ألهمنى وقلت للناس تعالوا نروح الأرض ونعاين إللي حصل ونبهت عليهم مفيش أى حد يروح ناحية المسقى والقطوع اللي حصل فى ارض الوله جرجس ولما رحنا هناك قلت للوله جرجس بص كدة ياوله على أى أثر لرجلين فى الأرض مكان الفتح
ولما بص قالي أيوه أثار رجلين عنتر أهى معلمة فى الأرض
والوله عنتر قال دى مش أثار رجليا دى لا مؤاخذة مقاسها كبير وقال للوله جرجس تعالي أوريك بعينك وفعلآ لما حط رجله فى مكان الأثر طلعت رجله أصغر بكتير ساعتها بس الوله جرجس صدق ان ده ملعوب القصد منه تحصل خناقة بينه وبين عنتر وسبت الواد جرجس وهو قاعد يجيب العيال اللي بيشك فيهم ويشوف مقاس رجليهم زى حكاية سندريلآ إللي كنا بنسمعها واحنا صغيرين وبعد ما قلتله ان عنتر ليه حق عرب عندك ياجرجس
عم رمضان
ده انت بلوى مسيحة يا شيخ حسن
الشيخ حسن
هو تادرس لسه ماجاش ؟
عم رمضان
مش عارف إيه إللي أخره يا شيخ حسن
الشيخ حسن
الغايب حجته معاه بس على الله ميكونش رجع فى كلامه
الحاج شرقاوى
يمكن حاجة عطلّته
عم رمضان
ما افتكرش يا شيخ حسن الواد زى ما شفته قصدى زى مانا شفته وشه كله جد وعزيمة
ياجماعة يالي هنا ياعم الشيخ رمضان
عم رمضان
أهو وصل
تعالي ياتادرس إتفضل إدخل ياأهلآ وسهلآ
تادرس
عواف عليكم إزيك يا شيخ حسن
الشيخ حسن
قول السلام عليكم
تادرس
السلام عليكم
عم رمضان
وعليكم السلام ورحمة الله وبركاته
إيه إللي أخرك كدة
الشيخ حسن
انا قلت يمكن راجعت نفسك ومش جاى
تادرس
إهيه وده إسمه كلام يا شيخ حسن هو أنا عيل صغير إنتوا ليه مش مصّدقيني
عم رمضان
مصدقينك ياتادرس ، احنا بس قلقنا عليك لما اتأخرت
تادرس
أصل الواد جرجس طب عليا وقت ما أنا خارج وجاى على هنا
الشيخ حسن
جرجس إبن أنيسة الهبلة
تادرس
إيوه
عم رمضان
وده كان عاوز منك إيه ؟
تادرس
لقيته جايب معاه ورقة كبيرة زى ورقة الرسم وقاللي حط رجلك هنا وجاب القلم وعلم حوالين رجلى وخد المقاس
قلتله هى إيه الحكاية ياجرجس
إياكش تكون عاوز تفصلي مداس جديد
وإيه المناسبة ده انت بخيل وما بيهونش عليك اللضا
وعمرك ما عملت خير فى حياتك
قاللي بعدين ياتادرس بعدين حتعرف كل حاجة وخد بعضه ومشى قمت انا جاى على هنا
الشيخ حسن
هاهاهاها
عم رمضان
بعدين نقولك هو ليه عمل كدة
ودلوقت انت جاهز ؟
تادرس
أيوه أنا إتسبحت بنية الدخول فى الاسلام وترك الشرك وقعدت أبكى كتير على إللي ضاع من عمرى وأنا على الكفر
عم رمضان
ربنا سبحانه وتعالى بيقول
وَإِنِّي لَغَفَّارٌ لِّمَن تَابَ وَآمَنَ وَعَمِلَ صَالِحًا ثُمَّ اهْتَدَىٰ
﴿طه: ٨٢﴾
الشيخ حسن
صدق الله العظيم
قرب منى ياتادرس
تادرس
أيوه يا شيخ حسن
الشيخ حسن
قول ورايا
أشهد أن لآ إله إلآ الله
تادرس
أشهد أن لآ إله إلآ الله
الشيخ حسن
وأشهد أن محمد رسول الله
تادرس
وأشهد أن محمد رسول الله
الشيخ حسن
وأشهد أن عيسى عبد الله ورسوله
تادرس
وأشهد أن عيسى عبد الله ورسوله
الشيخ حسن
وكلمته ألقاها إلى مريم وروح منه
تادرس
وكلمته ألقاها إلى مريم وروح منه
الشيخ حسن
وإن الجنة حق وإن النار حق
تادرس
وإن الجنة حق وإن النار حق
الشيخ حسن
وأؤُمن بالقدر خيره وشره
تادرس
وأؤُمن بالقدر خيره وشره
الشيخ حسن
وإن الساعة أتية لا ريب فيها
تادرس
وإن الساعة أتية لا ريب فيها
الشيخ حسن
وإن الله يبعث من فى القبور
تادرس
وإن الله يبعث من فى القبور
الشيخ حسن
وبرأت من كل دين يخالف دين الاسلام
تادرس
وبرأت من كل دين يخالف دين الاسلام
الشيخ حسن
مبروك ياتادرس إستنى لما أقوم أخدك بالحضن
عم رمضان
الله أكبر الله أكبر
الله أكبر الله أكبر
مبروك ياتادرس بالحضن يابنى
اللهم ثبتك على كلمة التوحيد
الحاج شرقاوى
مبروك ياتادرس الحمد لله إن ربنا نجاك من النارتعالى فى حضن عمك الحاج شرقاوى
تادرس
خلاص كدة أنا بقيت مسلم يا عم رمضان
خلاص بقيت مسلم يا شيخ حسن إنت والحاج شرقاوى
عم رمضان
إيوا والحمد لله
تادرس
معلش أنا بأبكى غصب عنى ياجماعة
ياااه جبل وإنزاح من على سدرى
عم رمضان
إبكى يابنى خلى دموعك تغسلك من جوه
الشيخ حسن
فاضل انك تتعلم دينك الجديد وإن جيت للحق هو مش جديد لأنه هو دين كل الانبياء وهو الدين إللي مفروض كل الناس يتبعوه
فاضل انك تتعلم كيفية الوضوء وكيفية الصلاة وعدد
الركعات فى كل صلاة وتعرف أركان الاسلام الخمسة وإللي انت أقمت أول ركن فيها دلوقت وهى شهادة
ان لآ إله إلآ الله وان محمد رسول الله
تادرس
نفسى أعرف كل حاجة عن الاسلام
عم رمضان
حتعرف بس واحدة واحدة
بس المهم حنعمل إيه بالنسبة لمرثا وعلشان الكنيسة ماتخدش خبر
تادرس
مرثا خلوها عليا وانا حاشرح لها كل حاجة بس فى الوقت المناسب
الشيخ حسن
أنا شايف انك تخفى إسلامك مؤقتآ حتى عن مرثا لحد لما نشوف حل
وعمك الشيخ رمضان حافظ القرءان وتبقى تقعد معاه كل ليلة شوية تسمعه وتسئله عن أى حاجة انت عاوزها وتحفظ السور الصغيرة علشان تصلي بيها
تادرس
ربنا يعمل إللي فيه الخير
عم رمضان
إن شاء الله
إنت بقيت دلوقت واحد منا وإحنا تحت أمرك ما تحملش هم
الشيخ حسن
ربنا يثبتك على الإسلام وخلى بالك ما تحكمش على الإسلام من تصرفات بعض الناس إللي حتقابلك
تادرس
إزاى يا شيخ حسن
الشيخ حسن
يعنى لو لقيت واحد مسلم بيسرق إو بينصب على حد حتى لو كان مربى دقنه فده مش عيب فى الإسلام ده عيب فى الشخص نفسه لأن الإسلام لا يأمر بذلك
الحاج شرقاوى
أنا ما أنساش الراجل النصاب أبو دقن طويلة إللي جه هنا عامنول وكان معاه شنطة كبيرة شايلها على ضهره ومليانه أكياس صغيرة فيها مسحوق أصفر وماسك ميكرفون فى إيده وبينادى
ويقول بعيداً عن الخداع والغش قول وداعاً لدود المش
كيس أبو عرام فيه واحد جرام وبجنيه واحد والجرام الواحد يكفى زلعتين مّش
يعنى الزلعة الواحدة تحتاج نص كيس بخمسين قرش والكفر كله إشترى منه والأخر يطلع إنه نصاب والكيس فيه حلبة مطحونة
الشيخ حسن
الجماعة دول فاكرينا عمى جايين يضحكوا علينا
تادرس
أنا ما أنساش اليوم ده الواد ميلاد الصايغ قاللي تشارك معايا إنت نص جنيه وأنا نص جنيه ونشترى كيس ونقسمه بالنص أنا وإنت قلتله ماشى
بس لما جينا نشترى كيس الراجل قاللنا ما ينفعش تقسموا الكيس بينكم لأن المسحوق لو شم الهوا وإنتوا بتقسموه حيفسد ويبطل مفعوله والأحسن كل واحد منكم يشترى كيس منكم بجنيه ده أضمن
وفعلاً كل واحد منا إشترى كيس بس طلع إنه حلبة مطحونة
وكل لما أفتكر الراجل وهو بيقوللنا إن المسحوق لو شم الهوا يبوظ وهو إصلاً حلبة مطحونة أموت على روحى من الضحك
الحاج شرقاوى
إللي يهلك من الضحك أنا لما رحت البيت لقيتها ماسكة الكيس فى إيدها وهو فاضى قلتلها إوعى تكونى حطيتى الكيس كله فى الزلعة أحسن الجبنة تموت
قالتلى ليه هو أنا عبيطة أنا حطيت نصه بس وسففت الواد الصغير النص التانى علشان الدود إللي فى بطنه يموت
عم رمضان
ههههههههههه
الشيخ حسن
فكرتونى بالذى مضى
أنا حلاوتهم قالتلى هات جنيه يا شيخ حسن علشان نشترى بيه كيس
قلتلها نشترى كيس نعمل بيه إيه ؟
قالت علشان نحطة فى زلعة الجبنة علشان يموت الدود
قلتلها هو فين الدود ده ؟ أنا ما أشوفش أى دود لما باأجى ااكل
تادرس
ههههههههههه
الحاج شرقاوى
هو إنت عاوز تشوف الدود يا شيخ حسن وإنت أعمى ؟